السلام عليكم ورحمة الله وبركاته
احببت ان يكون اول موضوع اضعه في هذه المدونة الجديدة “اقرأ أكثر” ، هو خطة كاملة متكاملة لدراسة اللغة الانجليزية على مدار عام كامل ، تم وضعها من قبل اخي المترجم المصري مايكل يوسف بامكانك متابعة صفحته الشخصية من هنا للحصول على جمل وعبارات ودروس تعليمية جديدة خاصة باللغة الانجليزية ، الخطة مرفق معها جميع الكتب اللتي تحتاجها والمذكورة ضمن الخطة ،ما عليك فقط هو التوكل على الله ثم العمل الجاد وبذل الجهد ، والابتعاد عن الكسل .
المدونة في طور الانشاء فاعذروني ان واجهكم خلل ما :).
ملاحظة : الخطة الموجودة هي من بداية شهر يناير عام 2014 ، ولكن لا بأس ابدا من تاريخ قراءتك لهذا الموضوع، وتقدم به بالترتيت . يعني مثلا انت قرات الموضوع في شهر 3 فبالتالي اعتبر شهر 3 هو شهر 1 وامشي بالخطة بالترتيب .
ساعرض عليكم الخطة كما وضعها المترجم مايكل يوسف في صفحته دون اي تعديل وسارفق لكم روابط الكتب والقواميس في نهاية الموضوع .
خطة مذاكرة اللغة الانجليزية لعام 2014 (يمكن تعديلها لتناسب الجميع) :
أولا هتحتاج الكتب و القواميس التالية (ستجدها في نهاية الموضوع)
Basic English Grammar Book 1
Fundamentals of English Grammar 3rd Edition
Understanding And Using English Grammar
Understanding And Using English Grammar Workbook
The Blue Book of Grammar and Punctuation
THE ULTIMATE PHRASAL VERB BOOK
English For You
قاموس صخر (عربي/انجليزي و انجليزي/عربي)
Oxford Advanced Learner's Dictionary - 8th Edition
ممكن نقسم مهمتك في 2014 لتعلم اللغة الي:
1- الفهم
2- الكتابة
3- التحدث
الفهم غالبا بيكون اسهل حاجة فيهم و لكن مهاراتك كلها في اللغة بتقوي مع بعض.
مهمتك في شهر يناير:
في شهر يناير هتذاكر كتاب Basic English Grammar Book 1
طبعا الكتاب صغير جدا ، عبارة عن 150 صفحة من الصور و شرحه مختصر و سهل فهمه. في ناس هتقول كله انجليزي و مش فاهمين حاجة ، مهمتك هنا هو انك تترجم كل كلمة مش غريبة عليك من قاموس صخر. الكتاب هو اول خطوة في اللغة الانجليزية ، طبعا مش سهل انك تترجم كل كلمة ولكن مش صعب ايضا. لازم كمان تكتب كل الجمل الجديدة في ملف ورد ، و اي تعبيرات جديدة.
مهمتك ايضا في شهر يناير انك تذاكر (مش تتفرج) علي 10 حلقات English For You علي youtube ، لما بقول تذاكر يبقي معاك ورقة و قلم و بتكتب الكلمات الجديدة و كل حاجة محتاج تفهمها تاني. انطق معاهم و وقف الفيديو و انطق مرة و اتنين و عشرين مفيش مشكلة. في فرق انك تتفرج علي الفيديو و انك تذكره.
شهر فبراير و مارس:
مهمتك في الشهرين دول انك تذاكر كتاب Fundamentals of English Grammar 3rd Edition ، الكتاب يعتبر 430 صفحة يعني كبير شوية. الكتاب كنز في الجمل و التعبيرات و طبعا الازمنة و الصفات و مبني المعلوم والمجهول و الافعال المساعدة و هكذا. الكتاب عايز ناس جادة فعلا وهو مش سهل و هنا هتعرف اذا كنت فعلا بتقدر تذاكر لوحدك ولا مش هتقدر ، بمعني اخر لو عرفت تكمل الكتاب لوحدك يبقي كدا اطمن هتقدر تحترف اللغة الانجليزية بدون مساعدة اي شخص. نفس اسلوب المذاكرة بتاعك الكتاب السابق ، لازم يكون عندك صبر و انت بتذاكر يعني في اول صفحة في الكتاب في سؤال بيقول
How long have you been in this city?
طبعا انت مش فاهم تركيبة السؤال ليه كدا ، المهم انك تكمل للاخر و تكتب اي ملاحظات في اجندة ملاحظات مخصوصة علشان ترجع لها بعدين و تشوف ايه المشاكل بتاعتك في اللغة.
هتذاكر في الشهرين دول 20 حلقة English For You بجانب الكتاب ، ممكن تتفرج علي الحلقة مرة الاول و بعد كدا تذاكرها. كل واحد فينا هيختلف في الاسلوب طبعا شوية عن التاني. ولكن اهم شيء انك تترجم كل كلمة مش عارفها حتي لو اتأخرت شوية في الجدول مش مهم ابدا ، المهم انك تكون بتذاكر يوميا و بتذاكر مش اقل من 3 ساعات. مع الوقت حصلة كلماتك هتزيد و فهمك للغة هيقوي و هتقرأ اسرع و احسن كل يوم. لازم كمان تنطق كل كلمة في موقع howjsay.com او في قاموس Oxford Advanced Learner's Dictionary
شهر ابريل و مايو:
هتذاكر كتاب Understanding And Using English Grammar ، و هو كتاب اصعب شوية و لكن هتتبع نفس الاسلوب. لازم يكون في اصرار انك تتعلم لان الموضوع مش سهل لوحدك ولكنه مش صعب كمان ، وفي ناس بتعمل كدا كل يوم و بتشوف انه شيء عادي. هتذاكر 20 حلقة في ابريل و مايو من English For You و دلوقتي اقدر اقول انك في شهر ابريل جاهز لاستخدام القاموس الانجليزي Oxford Advanced Learner's Dictionary
استخدام قاموس انجليزي انجليزي مش سهل في الاول ، يعني لما تشوف معني كلمة و تلاقي الشرح نفسه بالانجليزي هتحتاج في البداية تترجم الشرح نفسه للعربية ، متضايقش و لا تفقد الامل الموضوع هيبقي صعب في الاول و لكن بعد كدا مستواك اللغوي هياخد شكل تاني خالص. لما تفهم الكلمة بالانجليزية هتعرف الاستخدام الصحيح للكلمة. هنعمل مشاركة منفصلة ان شاء الله عن استخدام القاموس.
شهر يونيو و يوليو:
هتذاكر كتاب Understanding And Using English Grammar Workbook و هو كتاب رفيق للكتاب السابق و فيه تمرينات كتير ، مهم جدا انك مش تحل التمرينات بس ولكن تستخدم الحل في تقوية اللغة بتاعتك ، يعني لو اتعلمت كل شيء من الكتب دي عن استخدام الماضي و الماضي التام ابدأ في انك تتكلم عن شيء حصل لك في الماضي و تستخدم الماضي التام كمان. اكتب صفحة او زي ما تحب ، اقرأها مرة و اتنين و شوف اخطائك لوحدك بانك ترجع للكتب و تقارن و تشوف علي استخدمت الزمن بشكل صحيح؟ هل التصريف صح؟ و هكذا. لازم تتعلم نطق الكلمات لوحدها الاول و زي ما قولنا عندك قاموس اكسفورد و موقع howjsay. ابدأ كلم اصدقائك علي الفيس باللغة الانجليزية ، دا هيقوي مهارة الكتابة. هتذاكر عشر حلقات English For You في الشهرين دول علشان تركز اكثر علي التمرينات و الكتابة و نطق الكلمات و حفظها.
شهر اغسطس:
انت دلوقتي عملت شيء عظيم في سبع شهور ناس كتيرة متقدرش تعمله لانها مش عايزة تعمله ، مهمتك في الشهر دا هو كتاب The Blue Book of Grammar and Punctuation و هو كتاب صغير جدا ولكنه مفيد و هتلاقي فيه حاجات مشوفتهاش في الكتب السابقة. هتاخد معاه عشر حلقات English For You و تحاول تستخدم كلمات من الاجندة او ملف الورد في جمل جديدة علشان متنساش الفات.
شهر سبتمبر:
في الشهر دا هتخلص English For You و تراجع الحلقات كلها تاني ، هتحس انك استفدت اكتر بكتير من قبل كدا.
شهر اكتوبر:
هتذاكر كتاب THE ULTIMATE PHRASAL VERB BOOK و هو كتاب مهم جدا و يغني لغتك بتعبيرات قوية و هتبدأ فعلا تحس بداية قوتك في اللغة الانجليزية.
شهر نوفمبر و ديسمبر:
انت دلوقتي جاهز لانك تبدأ تقرأ كتب او روايات ، ان شاء الله نتفق علي الجروب علي كتاب او رواية. الكتب و الروايات هتقدر تاخد منهم كلمات كتير جدا و تفهم استخدمها الصحيح احسن من انك تذاكر كلمات بدون جمل تفهمك الكلمات دي ، التعبيرات الموجودة في الكتب و الروايات قوية و دلوقتي انت مستواك هيكون مستوي متقدم في اللغة ان شاء الله.
الروابط:
اولا: رابط الجروب المذكور في الخطة وهو جروب مايكل يوسف لتعليم اللغة الانجليزية ، حيث يمكنك ايضا الاستفادة منه ، ومناقشة تقدمك في التعلم ،وطرح اي سؤال او مشكلة واجهتك .
